Alaaf der kölsche Klaaf

zoletz jeändert: 2-.-1.2017 öm: 15: 1 Uhr  Druckerfründliche Sigg • 11812 × beluurt.

 
Leed »Alaaf der kölsche Klaaf« vun Edmund Stoll, zo singe op die »Herzens-Melodie«
 
Nümmes sall mer schängen
Ov en Unehr brängen
Uns Juwele-Schaaf,
Unse kölsche Klaaf.
De inn nit parleere,
Müssen inn doch ehre;
Wer inn no versteiht,
Op der Grund im geiht.

Wer jo Kölsch hööt kalle,
Luustert met Gefalle,
Aap et noh, ovschuns
Dat kein kleine Kuns.
Bönnschen un Berliner,
Dörenter un Wiener,
Noh beim Rhing ov fän,
Mallig höt et gän.

Wichtige Doktores,
Große Professores
Hann inn, we bekannt,
Ein schön Sprohch genant.
Wer well dat bestrigge?
't mäht kein dööre Zigge,
Wann e Muul-ohn-Engk
In och »Jargon« schengk!

We et uns gefällig
Jüs we Urgelbällig
Liehnt der kölsche Kall
Jedem Wohd der Schall:
Sööß zum Karesseere,
Soor zum Schengeleere,
Luppig för der Uuz,
Dröcklich för der Duuz!

Wis'elig un aadig,
Greislich un pomadig,
Klöhrlich un kumfuus
Quetsch mer sich drenn uus.
Nöören oder Nött'le,
Kieve, Bütze, Prött'le,
All an singem Plaaz,
Alles fump ganz staaz.

Tringcher, Drückcher, Niescher,
Sööße Augetrüüßcher,
Sin de andersch noch
Als en unser Sprohch?
Fingt Ehr unse Klüngel,
Unse Göhz un Schüngel
Och en andre Städt?
Nä! wat gilt de Wett?

Bus'ele, kladungle,
Griemelen un pungle,
Grauzen, bauzen, och,
Un wer weiß, wat noch!
Öven un flateere,
Sich me'm Flabes zeere,
Nirgens kraut mer dat
We en dis'er Stadt.

Mag 'ne jeck verzällen,
't göhv kein Dütsch en Köllen.
Saht ens, Nohber Klütsch,
Künne mer kein Dütsch?
»Loht inn schwaddroneeren!
Ävver hald en Ehren
Uns Juwele-Schaaf,
Unse kölsche Klaaf!«

Diesen Artikel bookmarken bei...

BlinkList del.icio.us Folkd Furl Google Linkarena Mister Wong Yahoo MyWeb YiGG Webnews

 
  <<< widder öm
 
Zufallsfoto aus unserer FotoGalerie
Impressum | Samstag, 16. Dezember 2017 | Copyright © 1998 - 2017 Udo Gerth, Köln | 1 Besucher online | # 1512895 | PI's: 4795451