Wieße Sonndaag

zoletz jeändert: 8-.-0.2017   Druckerfründliche Sigg •  Info zu: Peter Berchem • 7090 × beluurt.



 
Wieße Sonndaag! Feßlig klinge
all de Klocken en der Stadt,
schöner Fink und Amsel singe,
bunter lööchten Blöt un Bladd,
heller litt op Toon un Daach
hügg de Fröhjohrschsonnepraach.

Wieße Sonndaag! Engel kneene
am Altar em Feßgewand,
dragen Unschold op de Steene,
Kääzeleechter en der Hand;
Vatter, Mutter sillig stonn,
sinn ehr Kind zum Herrgodd gonn.

Wieße Sonndaag! Ich muß denke
an ming Jugendzigg zeröck,
an die Stund, die meer dorf schenke
su en einzig Engelsglöck.
Un op eimol, heiß un stell,
dröpp et hinger mingem Brell. - -
 
  <<< widder öm
 
Impressum | Mittwoch, 23. August 2017 | Copyright © 1998 - 2017 Udo Gerth, Köln | 1 Besucher online | # 1497094 | PI's: 4757446