Waldmaiaandaach

zoletz jeändert: 2-.-1.2017   Druckerfründliche Sigg •  Info zu: Peter Berchem • 6942 × beluurt.



 
Em Wald eß Maiaandaach. —

Su ävvens, grad en Stund noh Meddernaach,
hät Köster Wind et Lüggen engestallt.
All Maiklöckelcher ein Wald
se mooten hügg vun zwölf bis ein
ehr Bimbam-Bimbam-Bimbam" singe.
Dat wor e Ius un heimlig Klinge,
dat mich zor Maiaandaach hatt engelade!

Noch eß et stell em huhen Dom.
Nor höösch, ganz höösch geiht durch et Meddelscheff,
dorenn ene finge Maienedöff
wie Weihrauch steiht,
e Flösteren un e Mummele,
als wenn do einer wör am bedde
Wer mag dat sin, jitz medden en der Naach?
Süch do! Et eß de al Frau Müllenbaach,
die sich zick Johren alld hätt medden durch der Wald
ne Stationewääg .
en Stein und Grund geschnedde;
un ehre Wellezungeschlag klingk ganz,
als bääten einer stell vör sich
der Rusekranz.

Der Mond geiht op.
Hä streut sie Selverleech
op Wääg un Struch un Baum,
dat alles lööch rundsöm esu zauberhell
wie en dem schönsten Draum,
de mich beglöck en minge Kinderjohre.

Un wie ich do su stonn un lore
voll Staunen en die Märchepraach,
kütt widder Köster Wind ze gonn
un setz isich met Bedaach
- hä eß och Orgeleß ein Dom —
jitz an sien urald Instrument
do bovven en dä prächtige Krune.
Hä spillt dorop, esu zaat et geiht,
en eige Melodie.
En Nachtigall, die hee noh langer Faaht
sich widder ens der Heimat freut,
stemmb glich derzo ehr Wunderstrophen aan,
worenn esu ganz apaat
wie wahl en keinem andere Leed
die Königin besungen weed,
die üvver all de Engelchöre
ein Himmel darf et Zepter föhre.
Dat Deerche singk
sing Muttergoddeslitanei
allein un zunder Raß,
bis dat dem Mond sie Leech verblaß,
un Morgesonnegold sich stödig
op Gras un Bladd un Blöte läht.
Ei Vüggelche noh'm andere wackrig weed
un hivv sie Köppche, määht "Zi-piep!«
Un springk us singem wärme Neß.
Un wie op eimol jitz der Orgeleß,
als hätten hä darop gewadt,
sie stärks Register trick,
do präludeet de Blädderorgel
gewaldig,
un all die Sängere, noh un wigg,
ein jeder op sing Aat,
se setzen en met ehrem Feßgesang:
"Maria, Maienkönigin."

Villdausendstemmig eß dä Klang,
dä do eropsteig en et Himmelsblau.
Ich singe met un größe
die hellig, reinste Frau
un lägen ehr mie Leid getrus zo Föße.
Zo goder Letz noch bedden ich
e kräftig Vatterunser,
un all die Vuggelstemmcher bedden och
un jubileere sonnesillig
ehr "Amen! Amen!" -

De Maiaanzdaach ein Wald eß uus:
Wie einzig eß se doch
die Mutter voll der Gnade,
wie einzig och dat gröne Goddeshuus!
 
  <<< widder öm
 
Impressum | Samstag, 16. Dezember 2017 | Copyright © 1998 - 2017 Udo Gerth, Köln | 1 Besucher online | # 1512895 | PI's: 4795429