Der stelle Wääg

zoletz jeändert: 2-.-1.2017   Druckerfründliche Sigg •  Info zu: Peter Berchem • 10479 × beluurt.



 
Ben immer för mie Levve gän
ne stelle Wääg gegange,
wo mingen Bleck kunnt en der Fän
an Birg un Himmel hange,
wo stell de Looch, un stell der Stein,
un ich me'm Herrgodd wor allein.

Hatt ens et Glöck an mich gedaach,
sich bei mer engefunge,
om stelle Wääg hann ich gelaach
un ben vör Freud gesprunge,
de Looch wor stell, un stell der Stein,
un ich me'm Herrgodd ganz allein.

Su off e Leid mich dröcken dät,
de Sorge gar nit weche,
ich hann om stelle Wääg gebäät
un hann mich uusgekresche:
De Looch wor stell, un stell der Stein,
un ich me'm Herrgodd ganz allein.

Un wa'mer eimol gar nit rääch
e Leedche wollt gelinge,
dann gingk ich op dä stelle Wääg
o kunnt ich widder singe:
Do klung de Looch, do klung der Stein,
der Herrgodd hoot mich ganz allein!
 
  <<< widder öm
 
Impressum | Samstag, 16. Dezember 2017 | Copyright © 1998 - 2017 Udo Gerth, Köln | 1 Besucher online | # 1512895 | PI's: 4795438