Wie et Pitterche un et Annche en Ferie ...

zoletz jeändert: 6-.-0.2017   Druckerfründliche Sigg •  Info zu: Peter Berchem • 13967 × beluurt.



 

Et wore Ferie! Et Pitterche un et Annche, zwei rächte kölsche Quante vun zehn un aach Johr, met enem Kopp voller Streich, ävver nem Hätz got un weich, wore tireck am eeschten Dag vun ehre Eldere, die e Kies- un Eiergeschäff an Zinter Vring hatte, op et Land bei de Groß gedonn wode. Su wore se de Eldere, die ärg vill ze dunn hatte, för die fünf Woche us de Föß, un de Groß fraut sich, dat se de Bäckelcher vun ehre Enkelcher, die en Kölle trotz Kies un Eier jet mager un blaß gewode wore, widder rund un rut maache dorf.
Bei der Groß hatten die zwei Trabante wie jedes Johr, wann se do en de Ferie wore, Freud mih wie ze vill. He kunnte se sich esu räch usrölze, danze un springe, un laache un singe, wie se Loß hatte, un die hatte se der ganzen Dag. Wann och de Groß ald ens säht: "Waht, ich schecke üch morge widder no Kölle, ehr stellt mer jo noch et Hus op der Kopp", su kunnt mer doch ehre ahl gotmüdige Auge ansinn, dat ehr dat nit ganz ähnz wor, dofür hat se ehr Enkelcher vill zo gähn bei sich. Dat woßten die zwei ävver och, un wann se ens widder ne Streich gelivvert hatte un de Groß schänge wollt, dann sprunge se vun beize Sigge op se an, gove ehr enen Butz, de Groß laachte, un dat Kreppche kunnt widder vun neuem loßgonn.

Wat hat de Groß nit för ene schöne, staatse Gade! Veer Äppel-, drei Birre-, un fünf Prummebäum hatten et raggeweg drop avgesinn, dem Pitterche un dem Annche et Klemme beizebränge. Dat verstunten se och bahl besser wie et Eimoleins. En nem Rüppche soßen se bovven en der Krun vun nem Baum un schnabeleeten do wie de Mösche, un mänchmol su lang, bes se Buchping krägte. Dann säht de Groß zwor: "Su, dat eß üch got,dat eß de Strof derför, dat ehr esu ungenüßig gewäs sid"; ävver Peffermünztee kochte se innen doch un hat nit eher Rauh, bis dat verdorve Mägelche widder en Odenung wor. — Eimol ging de Groß durch der Gade un reef noh denne zwei. Die soße grad huh en nem Prummebaum, ävver se reppten un wägten sich nit, bis de Groß grad unger däm Baum wor. Do schöckelten et Pitterche hösch an nem Aß, dat die Prumme der ärm Groß öm der Kopp eröm floge. Die meint, dat hätt der Wind gedonn un säht för dä Nohber, dä grad üvver de Heck lorte: "Et eß bahl Zick, dat de Prumme avgemaht wäde, se sinn ald üvverrief". Do fingen die zwei Ströpp em Baum an ze laache, un et Annche reef erav: "Leev Groß, mer sin ald am avmaache!" "Waht, ehr Nixnotze! Wann ehr erunderkutt, dann gitt et Prumme", drauten de Groß nom Baum erop, un wat gov et nohher? — Prummekooche!

De Groß hat ävver nit bloß ene Gade, se hat och ene Geißtestall met er schön wieß un schwatz gefleckte Geiß. Där mahten die zwei Trüppcher off ene Besöck un hatten ehr Spaß an däm Deer, dat esu schön met däm Stätzge wibbele un esu nett dozo "enä" sage kunnt. Subahl die Pute en däm Stall wore, fingen se dat Leedche vum Ohm Will an ze singe, dat se vun ehrem Vatter geleht hatte:

"Et log ener Geiß ens schwer om Hätz,
Dat se bloß hat dat Stümpche Stätz.
Dä Stätz, dä wollt nit waße,
Dä Stätz, dä wollt nit wi — wa — waße!"

Un wann se en däm Leedche esu wick gekumme wore, dann trok et Pitterche die Giß an ehrem Wibbelstätz, un glich mahten dann dat Deer: "Enä — ä — ä — ä, enä — ä — ä — ä!" Un dann hätte sich die zwei bahl schibbele künne vör Laache, bis de Groß der Stall opmaht, dat Kreppche sich aanhoot un — metlaachte.

Üvver däm Geißtestall wor ene Heuboddem. Do kunnt mer et Pitterche un et Annche en der eeschte Zick vun de Ferie och off finge, dat heiß, mer moht se got söke, su deef hatten se sich mänchmol dat Heu erengemurkelt. Dann reefen se metunger, su hatt se kunnte: "Gro — o — oß! Gro — o — oß! Un wann dann die got Frau op dat Geschrei eropgelaufe kom, dann wor alles müsgestellt, un se sooch nix wie ehr Heu. Späder sooch mer et Annche ävver nit mieh en däm Heu, do wor nor et Pitterche dann un wann noch ens do, un dat kom esu. Eines Meddags, als die zwei em Heu esugar engeschlofe wore, do leef dem Annche op eimol e vörwetzig Müsche üvver et Geseech. Dorüvver woot et wach, un wie et de Auge opmaht, do soß dat Deerche grad op singem rächte Bein un maht e Männche. Dat Müsche op däm Bein sinn, ne gewaldige Krieh dunn, opspringe un de Leider eravkiele, dat ging flöcker bei däm Annche, als wie ich et verzälle kann. Sick der Zick wor ävver dat Mädche nit mieh vun singem Broder op et Heu ze krigge.

Bei rähnigem Wedder dorften de Kinder op die große Läuv gonn, die sich üvver dat ganze zemlich lange Hus hertrok. Wer do meint, dat wör doch keine Openthalt för Kinder, die spille welle, ald allein wäge däm Dreck un Stöpp, dä op de Läuv jo miestens ze finge eß, dä hat sich he fieß verdonn. Op der Groß ehrer Läuv wor et, wie üvverall em Hus, blezeblank. De Dille wore wie geleck, die moht de Mähd alle Woche einmol opnemme, un an de Hahnebalke wo kei Spennche ze finge, un die veer Läuvefinster bletzten wie die en der got Stuvv un leeten esu vill Leech durch, dat mer en jeder Eck sinn kunnt, wie rein et do wor. De Groß sooch och he der Mähd scharf op de Fingere, denn he dät se, wann et rähnte, de Wäsch drügge, he dät se et Obß em Winter, fresch un engemaht, verwahre, un nor en einer Eck, do stund, wat mer esu nennt, allerlei brassel un Läuvekrempel. Un grad die Eck wor an dä Dag, wann de Engelcher em Himmel schrubbe mohte, wie die Groß säht, för et Pitterche un et Annche e gefunge Fresse.
Allein gingke se zwor nit do erop, winnigstens et Annche wollt et nit, zickdem et Pitterche do bovven em Halvdunkel ens Gespens gespillt un sie Schwesterche äklich bang gemaht hat. Et Annche sorgten immer doför, dat noch drei oder veer Pute us der Nohberschaff, met dänne se och söns ald ens zesammespillte, met eroptroke, un de Groß hat och gar nix dergäge, nor säht se dann gewöhnlich: "Maht mer ävver nit ze vill Spektakel do bovvve un doht alles widder fott, wat ehr eruskrohmt." Dann gingk dat ganze Schmölzche op de Ziehe de Trapp erop, un se sproche kei Wötche, bis se de Läuvedör hinger sich zogemaht hatte. Ävver dann fing de Kirmes an.

Do stund en der Krempelseck e mächtg groß alt Kleiderschaaf, woren allerlei Wöbcher vum Großvatter sillig, die de Groß met ehrem golde Hätz nit hat fottgevve künne, verwaht wohte. Der Großvatter wor Föschter gewäs, un do hingen dann noch en däm Schaaf sing Werkeldags- un Soondagsuniform, sing grön Mötze un Höt, do stunte sing Zäbele un Gewehre. Dat wor get för et Pitterche un sing Kamerade, wann se sich de Mötze opsetze, ne ähnze Zäbel ömschnalle un met em ähnze Gewehr op der große Läuv Zaldat spille kunnte. Et wor got, dat die Kumpanie nor us zwei oder drei Mann bestund — et Pitterche em großvatter singem Galahot wor selvsverständlich immer der Haupmann — de ganze Läuv wör söns eravgekumme, su stramm mahten die Junge Paradeschrett. Dä Paradeschrett, dat wor däm Haupmann Pitterche sing Spezialität, dä hat hä nämlich ens met singem Vatter am Kaiserschgebohtsdag om Nümaat gesinn, un dä hat im von all dä Fisematentcheram beste gefalle.

En der Zick, dat de Junge Kammis spillte, soß et Annche met singer boore Fründinne för 'ner ahl, große Kummod, die met ehrem gewaldige Ömfang genau zo däm Kleiderschaaf paßte. Die veer Kummodeschublade wore peckevoll Sächelcher, Dose un Döscher, met un ohne Enhalt, Helligebildcher un Photographie, Schleifcher un Schlöpcher un Bengelcher us der Groß ehrer Jugendzick, Schlofmötze un Häubcher, ahl Strümp, Hemder, Underröck, Gebett- un Leseböcher, Kinderschöncher un Koppdöcher, üvverhaup alles, wat nor ener Läuvekommod ze finge eß. He wor et Annche en singem Element, he kunnt et noch vill besser wie en Kölle "Robes un Modes" spille, denn esu gedöldige Modellpoppe, wie die boore Mädcher, hat et en Kölle nit. Die leeten alles met sich anfange un heelten de Mul för Staune un Verwunderung wick op, wann däm Annche dat Müngche ging wie en Kaffeemüll. Et wor zum Scheeße, wann dat Weesch wie en eeschte Lademamsell vun der Huhstrooß dä Jüffercher de Häubcher vunder Groß obschwätzte un opsatz, inne bahl heh, bahl do e Schlöppche anstoch oder inne nen Underrock als Schleppkleid passend maht. Un keiner wor stolzer wie et Annche, wann et dann, nohdäm se alle drei op et nobelste usstaffeet wore, met enem Fächer us der Groß ehrer Danzstungezick en der Hand, op un av stizelte, de Underrockschlepp hin- un herworf un su dä boore Kinder zeige kunnt, wie et de fing Madamme zo Kölle maache. Schleeßlich kunnten die et dann och, un dann ging et Ärm en Ärm üvver de Läuve Huhstrooß.

Hatte su die zwei Partie, de männliche op der ein un de weibliche op der ander Sick von der Läuv genog "getrennt" gespillt, dann kom zum Schluß et "gemisch" Spill an de Reih, dann spillte se dat, wat för kölsche Kinder et schönste eß, wat et op der Welt bahl gitt — Fastelovend! Kostümeet woren de Pute jo ald, de Junge als Zaldate un de Mädcher als Underrockschleppemadamme. Dann satz et Pitterche bloß de gewehre widder en et Schaaf un nohm vun de Kummod e klei Driehörgelche, wie de Italiener mänchmol ein han, wann se en Kölle lans de Dörre gonn. Dat Örgelche wor och noch vum Großvatter, dä ne echte kölsche Jung gewäs wor. Hä hat sich dat Dinge, wie hä noch jung verheerot wor, us Kölle kumme loße, weil hä kein Klaveer oder e ander Instrument spille kunnt, öm des Sonndags oder bei feßliche Gelägenheite en däm stelle Föschterhus medden em Wald get Musik zo hann. Dat Örgelche spillte natörlich luter kölsche Fastelovendsleedcher, wie "De kölsche Kirmesse", "Ohne Mädche geiht et nit", "Et Schmitze Nettche", "Rude Wing, dä stopp", "Et Schnüsse-Tring", "Lorenz, loß dat Kind en Rauh" un wie die ahl Leedcher all heiße mügge. Dat kom dä Quäß op der Läuv jetz zo paß. Wenn dat Örgelche och nit mieh su neu wor un et im ging wie däm sillige Palm singem Driehkeßche un dann un wann grad bei de schönste Stelle ft — ft — ffft maht, dat däht nix, et Pitterche heelt sich am driehe, un et Annche un die andere Kinder kome nit us däm Danze, Juhze un Singe. Metunger hoht et Pitterche ens op, nohm der Hot en de Hand un ging en der Gesellschaff rund un säht wie ne richtge kölsche Italiener: "Meino Herrschafto, eino Soldo füro Italiano". Un dann packten die andere us, wat se grad en der Täsch hatte: Nähl, Botzeknöpp, Greffele, Prumme, Ömmer, Berre, Döpp un worfe se däm Pitterche en singe Offerstock. Et Pitterche dankten dann met ner äch italienische Verbeugung un fing widder an ze driehe, bis et der Groß unger doch schleeßlich ze doll woot, se eropkom un däm Fastelovend Feerovend maht. Jitz moht eesch widder alles an Oot un Stell gesatz un gehange wäde, un dann ging et de Trapp erav zum Ovendesse.

Nohm Esse satz sich dann de Groß noch e Stündche met ehre Enkelcher op de Bank för de Husdör un verzallt inne vun ahl Zigge, vum Wald un besondersch vum sillige Großvatter, wat dat för ne staatse un gode Mann gewäs wör, wie dä de Kinder esu gän gehatt hät, un wat dä sich jitz freue wöht, wenn hä noch lävte, dat hä su en brav Enkelcher hät. Un dann gingke se alle drei en de got Stovv, wo däm Großvatter sing Bild hung, däten e Vatterunser för in bedde un gingke schlofe.

Wat woren dat schön Dag! Kei Wunder, dat et Pitterche un et Annche bettere Trone kresche, wie der letzte Sonndag kom, un ehre Vatter se widder noh Kölle hollte. Ävver ehr weßt et jo selver, wie et einem öm et Hätz eß, wann die schön Ferie am Engk sinn, un — de Schull widder anfängk; denn et eß noch mänch Pitterche un Annche unger üch, die och esu vill Freud en de Ferie gehat hann, wenn se och nit grad bei esu ner god Groß gewäs sin.

 
  <<< widder öm
 
Impressum | Dienstag, 27. Juni 2017 | Copyright © 1998 - 2017 Udo Gerth, Köln | 1 Besucher online | # 1490632 | PI's: 4740945