Jlobal Kölsche Sigge.de - 6-.-0.2019
URL: http://jlobal-koelsche-sigge.de/berchem.php?Rid=125

Un wor Ding Heimat noch esu ärm,
Dien Eldernhuus och klein un nidder,
Wie schleiht Dien Hätz esu fruh, su wärm,
Süühs Do se spääder noch ens widder!

Ding ganze Kindersilligkeit,
Die längs em Schecksal ging verloore,
Op eimol Deer vor Auge steiht
Su fresch wie en de Jugendjohre.

Do sitz noch ens om Mutterschuß,
Do Spills met Dinge Kamerade —
»Sag, weiß Do noch?« frög leev un lus
De Schull, de Kirch, de Gaß, der Gade.

Et pack Dich wie met Zaubermaach,
Als künns Do noch ens jungk hee wäde:
Dä Ood, wo Do als Kind gelaach,
Eß doch der schönsten op der Ääde!
© 2006 Udo Gerth, Köln
Alle Rechte vorbehalten.
 
Zum Thema: Peter Berchem, *1866 - †1922 • http://jlobal-koelsche-sigge.de/berchem.php?Rid=125