Jlobal Kölsche Sigge.de - 6-.-0.2019
URL: http://jlobal-koelsche-sigge.de/berchem.php?Rid=136

All, die om Wäg zerlump,zerresse
un scheu an uns vorüvvergonn,
vun räächter Arbeid nichs mih wesse
un Daach un Desch un Lieb vermesse,
die ha´mer immer leid gedonn.

Wer reß ehr Levvensglöck zesamme?
Wor nit ene Judas bei der Hand?
Wie wor dä Baum, vun däm se stamme?
Woherr die heiße, düstere Flamme,
die inne Liev un Siel verbrannt?

Wor mallig och die Kraff gegevve
ze drage, wie et Schecksal schlog?
Un wann dat för et ganze Levve
nichts als ene Krützwääg hatt verschrevve,
dröck zo vill Leid nit wie ne Floch? -

All, die om Wäg zerlump, zerresse
un scheu an uns vörüvvergonn,
vun räächter Ärbeid nichs mih wesse,
die Daach un Desch un Lieb vermesse,
m e e r hann se immer leid gedonn!
© 2006 Udo Gerth, Köln
Alle Rechte vorbehalten.
 
Zum Thema: Peter Berchem, *1866 - †1922 • http://jlobal-koelsche-sigge.de/berchem.php?Rid=136