Der Ritter

zoletz jeändert: 6-.-0.2017   Druckerfründliche Sigg •  Info zu: Schneider-Clauß • 7746 × beluurt.

 
De Schull geiht us, voll Kinder eß
Et Plätzgen un de Strooß;
Et springk und singk sie Miets un Beß,
Un alles läuf un roos.

Do hinger kraut en Jungeschwitt
Nem Trüppche Mädcher noh,
Dat läuf und juz un schreit und krieht
En Kleidcher rud un bloh.

Un ob de Kleidcher bloh und rud
Flüch Inne Klett ob Klett,
Ob Kleid un Kopp, ob Hoor un Hot,
Als ging et öm de Wett.

Die Lotterboven han ehr Spaß
Besondersch an däm Groß
Met schwatze Flächte lang un faß,
Do schmießen se drob loß.

Vun Kletten eß et wie berähnt,
Et kriesch vör Wot un schängk,
Bes Im der langen Hein begähnt,
Do hät sie Leid en Engk.

Dä schmieß sing Böcher ob de Äd,
Springk en die Jungeschwitt
Un schrubb! Dä grad geworfen hät,
Dä Fuß me'm Hals hä kritt.

Em Rüppche fällt dä fusse Fetz
Un tirvelt en de Sod,
En Dobbeldotzend Knuze setz
Der Hein im en der Wot.

Vill Hung doch sin - su säht mer wal
Dem Hase singen Dud:
Et packen in die andern all,
Der Hein kütt ärg en Nut.

Do ävv -er kurageet et Züff
En't Jungeschmölzgen höpp,
Met singer Schultäsch dellt et Püff
Dä Räub'ren ob de Köpp.

Et schleit, als dröösch et Holz un Stein
Un hät un hät nit ob;
Die Fetze fleegen usenein
Un halde, sich der Kopp.

Doch wie zoletz der Hein obsteiht,
Voll Mutt un voll Moraß,
Do laachen hellöb trotz dem Leid
De Mädcher un han Spaß.

Wie ävver met der Schulltäsch dräut
Et Züff, do sin se kusch;
Se merken: Hee weed nit gefleut!
Un han sich fottgefusch.

Met singem Sackdooch wisch dem Hein
Et Züff der Dreck vum Jack,
Hä nimmb de Klette höösch und fein
Im av, - ne ganze Packl

Ob heim an, stitzelt stolz et Züff,
Stolz schrick der Hein derbei;
Se denke: Minsch, wells do kein Püff,
Dann loß en Rauh uns zwei.

Diesen Artikel bookmarken bei...

BlinkList del.icio.us Folkd Furl Google Linkarena Mister Wong Yahoo MyWeb YiGG Webnews

 
  <<< widder öm
 
Impressum | Dienstag, 27. Juni 2017 | Copyright © 1998 - 2017 Udo Gerth, Köln | 2 Besucher online | # 1490632 | PI's: 4740911