Do ha'mer der Rähn

zoletz jeändert: 2-.-1.2017   Druckerfründliche Sigg •  Info zu: Schneider-Clauß • 7444 × beluurt.

 
Zwei Hüser faß zesamme,
Zwei Dürre nevvenan, —
Wie ka` mer wal jet nöhter
En Goddes Welt nor han!

Ob stonn de beidse Dürre,
De Gadern die sin zo,
Om eine hängk der Hendrich
Un süht de Stäne noh.

Om anderen et Zuffei
Och noh de Stäne kick;
Sing Auge glönich gletzre. —
Et eß Huhsommerzick.

"Wie schön stonn hück de Stäne,
Su bletzig un su blank!" —
"Et well noch gar nit rähne;
Ich gläuv, dat weed noch lang!"

De Stäne däte laache
Ganz lus un stell un fän:
Off, eh mer't denk, ehr Minsche,
Kütt ganz vun selvs der Rähn. — —

Em helle Summerkleidche
Wie wor dat Zuffei nett!
De Stänen un der Hendrich
Die merkte dovun jet.

De Stänen ävver stunte
Ze wick ob ehrer Bahn,
Der Nohberschjung, der Hendrich,
Dä wor vill nöhter dran.

Weiß Gott, wie et gekumme:
Ob eimol log sing Hand
Om Zuffei singem Ärme, —
Die wor su heiß un brannt.

Noh'm Hendrich sohch et Zuffei,
Noh'm Züffei sohch der Hen,
Als wollte sei sich bohre
Deef en et Hätz eren.

Am Himmel huh de Stäne
Die quinkte lus sich zo:
Jetz weed et jielig rähne,
Paßt ob ens unger dol

Kaum hatte drob de Stäne
Met "Gott wal's!" sich bekrütz,
Do hatt der langen Hendrich
Et Zuffei och gebütz.

Jitz noch ens, — do als wider,
Se hote gar nit ob.
Vun fäns e Wedderleuchte
Am Himmel trok erob. — —

En Mön die hatt gelestig
Däm Spillche zogesinn:
Su ein, die gän noch selvs ens
Su räch gebütz mööch sin;

Die klaften et de Ahle
Fröhmorgens — un de Stän
Die han ehr Räch behale:
Do hatte se der Rähn!

Diesen Artikel bookmarken bei...

BlinkList del.icio.us Folkd Furl Google Linkarena Mister Wong Yahoo MyWeb YiGG Webnews

 
  <<< widder öm
 
Impressum | Samstag, 16. Dezember 2017 | Copyright © 1998 - 2017 Udo Gerth, Köln | 1 Besucher online | # 1512895 | PI's: 4795458